Sannur Mótorhjólamaður

Heiddi og Steini Tótu að keppa í snigli 2006

Sannur Mótorhjólamaður

Menn spyrja sig oft hvað það eiginlega er sem skilgreinir hinn sanna mótorhjólamann.

Margar skýringar eru til á því hugtaki en sunnudaginn 2. júlí, 2006 á leið heim af landsmóti Snigla, kvaddi þó þessa jarðvist sá maður sem helst hefði getað staðið undir því nafni. Eilífðartöffarinn Heiðar Þórarinn Jóhannsson, betur þekktur sem Heiddi #10 , var einfaldlega mótorhjólamaður Íslands númer eitt. Segja má að þú hafir ekki getað talið þig mótorhjólamann fyrr en þú vissir deili á honum.
Listinn yfir það sem undirstrikar þetta er endalaus eins og margir geta vitnað um og skal hér aðeins minnst á fáein dæmi.

Sannur mótorhjólamaður er sá sem fer á hverja þá samkomu mótorhjólamanna sem haldin er, sama hvar á landinu hún er haldin og þá oftast en ekki hjólandi.

Sannur mótorhjólamaður er sá sem keppir í akstri torfærumótorhjóla kominn á sextugsaldur, ánægjunnar vegna.

Sannur mótorhjólamaður er sá sem safnar mótorhjólum og munum þeim tengdum eins og aðrirsafna listaverkum, og skreytir íverustaðs sinn með þeim.

Sannur mótorhjólamaður er sá sem býður þér lyklana að húsi sínu þótt hann sé ekki á staðnum, af því einu að þú ert á mótorhjóli og vantar stað til að gista á.

Sannur mótorhjólamaður er sá sem staldrar við til að aðstoða ókunnugan mann við bilað mótorhjól og fer ekki fyrr en búið er að koma því í gang.

Tían Bifhjólalúbbur Norðuramts var stofnaður eftir fráfall Heidda til heiðurs honum. . Nafnið Tían, er vegna þess að Heiddi var númer Tíu í Sniglunum

Sannur mótorhjólamaður er sá sem fær meira segja hundinn sinn til að hafa áhuga á mótorhjólum og akstri þeirra.

Sannur mótorhjólamaður er sá sem áratugum saman eldar svo góða súpu ofan
í landsmótsgesti Snigla að hún verður landsfræg.

Sannur mótorhjólamaður er sá sem er sá sem tekur lengri leiðina heim frá landsmóti Snigla, þó að leiðin sé nú orðin lengri en nokkrumóraði fyrir þegar við kvöddum þig þar.

Sannur mótorhjólamaður er sá sem fær það til að vera algörlega viðeigandi að spila „Blue Jeans Blues“ við útför sína.

Sannur mótorhjólamaður er að lokum sá sem fær fólk til að koma í hundruðatali á mótorhjólum frá öllum landshornum, til að kveðja þig hinstu kveðju.