Bifhjólasamtök lýðveldisins, Sniglar, héldu í dag sína árlegu 1. maí hópkeyrslu þegar yfir 870 mótorhjólakappar tóku þátt í hópkeyrslu í góðvirðinu. Ekið var niður Njarðargötu, Sóleyjargötu framhjá tjörninni niður á Sæbraut og svo upp Ártúnsbrekku, lauk ferðinni við Bauhaus.
Þar var matur fyrir hjólarana þar sem Vöffluvagninn og 2guys höfðu komið sér fyrir til að mótorhjólakapparnir gætu gætt sér á ljúffengum veitingum.
Þar að auki bauð B.A.C.A uppá frítt kaffi og kakó.
Þorgerður Fríða Guðmundsdóttir, formaður Snigla, sagðist vera spennt fyrir sumrinu og því loks geti mótorhjólafólk tekið hjólin út úr skúrnum.
„Veturinn var erfiður og fáir dagar þar sem göturnar voru þurrar og hægt var að nota hjólin þó svo að einhverjir hafi gert það í vetur.
Nú getum við farið af stað og við vorum heppin með veðrið í dag, “ sagði hún í samtali við www.tia.is
Hringfarinn leiddi keyrsluna
Hún segir allskonar hjólum hafa verið ekið í hópkeyrslunni en sjálf aki hún um á Suzuki Hayabusa. Ferðin í dag hófst kl 12:00 við Hallgrímskirkju og fremstur í flokki var Kristján Gíslason Hringfari.
Sniglar hafa í gegnum tíðina verið virkir í umræðunni um umferðaröryggi og hafa barist fyrir ýmsum breytingum á umferðarlöggjöf sem og slysavörnum og forvörnum. Ferðin í ár var ekin til styrktar Grensásdeildar og er tekið við frjálsum framlögum.
Safnaðist 680 þúsund að þessu sinni.
„Ég vil fá að skila þökkum til Lögreglunar fyrir að hjálpa okkur við framkvæmd keyrslunnar. Einnig vil ég þakka reykjavíkurborg fyrir lokun gatna og vegagerðinni fyrir að hafa brugðist hratt við og sópað göturnar fyrir okkur,“ segir Þorgerður einnig.
www.tia.is
